الرئيسية
السلام عليكم ورحمه الله وبركاته
النهارده اسمحولى اعرض عليكم موقعين هما فرصه لكل شخص محترف تصميم وعاوز يدخل فى منافسة مع غيره وكمان يربح
الموقع الاول
Odesk.com
موقع عالمى كل اللى بتعمله انك بتشترك وبتحدد مهاراتك سواء تصميم بالفوتوشوب او تصميم ويب او حتى لو ليك خبره فى البرمجه او الكتابه وغيرها من المجالات الكتير جدا
فكره الموقع بسيطه وهى الربط بين العملاء اللى محتاجين عمل معين والربط بين الفرى لانسر اللى على اتم استعداد للقيام بالعمل ده
بيدخل العميل وبيحدد طلبه بالظبط وبيحدد كمان السعر اللى حيدفعه
بتجيلك نشره من الموقع ب ان فيه عميل بيطلب عمل محتاج مهاراتك وبيقولك العميل محدد سعر كام سواء السعر للعمل بالساعه او بالقطعه
لو عجبك العمل والسعر بتدخل بتقبل عرض العمل وبتحدد مده انجازه
بمجرد اتمام العمل زى ما العميل طلب بتاخد السعر المحدد من العميل وبتكون الفلوس فى حسابك
طبعا للتوضيح : مش انت فقط اللى بيتبعت ليك طلبات العملاء وانما لغيرك كمان ف انت فى منافسه لان العمل الواحد فيه احتمال كبير جدا يكون مصممين كتير قبلوه وبينفذوه والعميل حيختار من بين االتصميمات للى حتتعرض عليه تصميم واحد فقط هوه اللى حيدفع سعره
والاسعار عامه بتبقى عشره دولار للكروت الشخصيه ومئات للبروشور والاف لتصميم المجلات
يعنى لو حتى قضيتها كروت شخصيه بس وتميزت فيها ونافست غيرك وبقيت كل يوم بتعمل كارت واحد وبيتوافق عليه حتقدر تعمل عشره دولار يوميا يعنى 300 دولار بالمصرى 1700 جنيه شهريا وانت قاعد فى بيتك
طبعا ممكن ناس تيجى تقول مش معقوله الامر بالسهوله دى
علشان كده احب اوضح ان الامر فعلا مش بالسهوله دى لان تصميماتك لو مش مميزه يبقى مفيش عميل حيقبل بيها
لكن لو انت تصميماتك مميزه يبقى حرام تضيع فرصه زى دى خصوصا كمان لو احترفت البروشور اللى اسعاره فى الموقع المذكور بتوصل ل 200 و 300 و 400 دولار على البروشور الواحد
ده بخلاف اسعار المجلات اللى بتوصل ل الف والفين وتلاته فى تصميمات المجله الواحده وطبعا اسمك عليها
فيه للاسف تكتم شديد من المحترفين بالعمل فى الموقع ده علشان كده حبيت انى اذكره ومن ناحيه الدفع اتطمن تماما لان الموقع ثقه مليون فى المئه وناجح للغايه وبيدفع
ليك كمان انك تطلب منهم ماستر كارد صادر من شركه بايونير وحتوصلك لحد باب بيتك وانا شخصيا معايا واحده وعليها اسم الموقع وحبقى اصورها واعرضهالكم وميزه الفيزا دى ان بمجرد ما العميل يدفع فلوسك حينزل المبلغ ده فى الفيزا وتقدر تسحبه من اى ماكينه صرف الى عليها شعار ماستر كارد
———-
الموقع التانى
getafreelancer.com
فكرته نفس فكره الموقع الاول ومشهور جدا وناجح ايضا
وللتوضيح : الموقعين المذكورين بيقبلوا تخصصات كتير جدااااااااااا بخلاف التصميم فبالتالى لو انت حتى ليك مهاره فى شىء تانى او ليك اخوك او صديق له مهاره فى شىء تانى يقدر برضه يسجل فيه ويكسب
طبعا فيه مواقع عربية تقليد لفكره الموقعين المذكورين بس مسمعتش عنهم خير بتاتا وكمان مواقع ميته وغير كده وكده ثقافه الدفع على الانترنت مش موجوده لدى العرب فبالتالى مش حتلاقى عميل يدفع لشخص قام له بتنفيذ عمل على الانترنت
اتمنى انى اكون افدتكم ولو بالقليل